Kur Mbyllja e Serbisë në Kosovë Konsiderohet Dhunë
Kur Kosova mbron ligjin, disa duket se shqetësohen për ‘koordinimin’. A do të preferonin ata që Serbia të instalonte edhe një postë tjetër në Kosovë?
Ishte e pashmangshme që veprimi vendimtar i Kosovës më 15 janar 2025, për të ç’montuar institucionet ilegale paralele të Serbisë1, do të nxiste kakofoninë2 e parashikueshme të kritikave nga “disidentët” vendas dhe një komunitet ndërkombëtar i habitshëm e i painteresuar në rend dhe ligj kur bëhet fjalë për Serbinë agresive të bashkërenduar me Moskën zyrtare. Megjithatë, Republika e Kosovës, 25 vite pas çlirimit dhe 17 vite pas shpalljes së pavarësisë, ka treguar se është e gatshme të zbatojë ligjin dhe rendin e saj kushtetues edhe përballë atyre që mbeten të magjepsur nga mitet e gërshetuara në Beograd, apo disa mbase edhe në Moskë. Ky veprim shënon një moment historik, një rikthim i integritetit territorial përballë këmbënguljes së Serbisë për të ruajtur një qeverisje hije brenda Kosovës.
Për shumë vëzhgues, veprimi i Kosovës ishte i vonuar. Strukturat paralele serbe, përfshirë administratat komunale, zyrat postare, shërbimet tatimore dhe sistemet arsimore, nuk janë shërbime të pafajshme për komunitetin serb në Kosovë. Përkundrazi, ato janë instrumente të drejtpërdrejta të politikave agresive të Beogradit për të minuar autoritetin e shtetit të Kosovës. Ndërhyrja e Beogradit, i cili ka financuar dhe kontrolluar këto struktura për më shumë se dy dekada, është një shkelje flagrante e së drejtës ndërkombëtare dhe një pengesë për ndërtimin e një shoqërie të qëndrueshme dhe shumë-etnike në Kosovë.
Ndërsa institucionet ilegale u mbyllën nga Policia e Kosovës, në një operacion të koordinuar me Ministrinë e Administrimit të Pushtetit Lokal, disa kritikë zunë të kapen pas detajeve procedurale, si mungesa e urdhrave të Prokurorisë3, një përpjekje kjo taktike për ta diskredituar këtë hap të nevojshëm. Prej tyre të cilët e ndjekin këtë logjikë, në këtë shkrim nuk mund të mos e përmendim me një buzëqeshje të hidhur Agon Maliqin4. Me sa duket zt. Maliqi paska gjetur një mision të çuditshëm: të përpiqet ta parandaloj Kosovën të mbrojë vetveten.
Maliqi, një figurë që shpesh ka shërbyer si megafon për narrativat pro-Serbisë dhe një kritik i pandreqshëm i çdo përpjekjeje për të forcuar sovranitetin e Kosovës, shpalli parashikime apokaliptike për një “kosto ndërkombëtare” që ky veprim mund të shkaktojë. Në një akt që rivalizon absurditetin më të lartë, ai sugjeroi se mbyllja e këtyre institucioneve është një manovër politike për të larguar vëmendjen nga çështje të tjera. Një interpretim që kërkon një imagjinatë të veçantë, duke pasur parasysh se këto struktura kanë qenë për më shumë se dy dekada një sfidë e hapur për rendin kushtetues të Kosovës.
Por le të mos ndalemi vetëm te Maliqi5. Reagimet ndërkombëtare, veçanërisht ato nga Shtetet e Bashkuara dhe Bashkimi Evropian6, ishin po aq zhgënjyese. Në vend që të mirëpresin këtë hap të domosdoshëm drejt forcimit të sovranitetit dhe respektimit të ligjit ndërkombëtar, ata zgjodhën të fokusohen te “koordinimi i dobët” dhe “koha e papërshtatshme” e këtij veprimi. Këto kritika tingëllojnë bosh kur vendosen përballë realitetit se këto struktura ilegale, e kanë shkelur ligjin për dekada me mbështetjen e hapur të Beogradit.
Material i huazuar nga Kallxo.com7 nga momenti i mbylljes se zyrës postare të Serbisë në Graçanicë, Republika e Kosovës.
Në këtë sfond të hipokrizisë dhe standardeve të dyfishta, zëri i Bekim Hamëz Jasharit rezonoi fuqishëm. Ai kujtoi sakrificat e bëra për të çliruar Kosovën dhe për të ndërtuar shtetin e saj.
“Deri kur kështu?” pyeti ai8, duke shprehur zhgënjimin e një brezi që ka parë sakrificat e tij të diskreditohen nga papagaj të cilët recitojnë interesat serbe në Kosovë. Deklarata e tij, që përfundoi me një mirënjohje të thellë për Policinë e Kosovës dhe një thirrje për lavdi për dëshmorët e UÇK-së, ishte një rikujtesë se liria nuk ishte dhuratë, por një arritje e fituar me gjak dhe vendosmëri.
Disa papagajë të Beogradit edhe mund të përpiqen ta paraqesin këtë si një moment ndarje, por, në të vërtetë kjo është një thirrje për bashkim të fortë. Populli i Kosovës duhet të qëndrojë i palëkundur pas udhëheqësve të tij dhe të refuzojë të bie në grackën e diskurseve të mbushura me dyshime dhe narrativa të cilat synojnë t’i dobësojnë përpjekjet për forcimin e shtetit. Nuk është koha për të diskutuar legjitimitetin e Kosovës si shtet; kjo çështje është vendosur një herë e mirë nga historia dhe nga drejtësia ndërkombëtare.
Ata që kritikojnë mbylljen e strukturave ilegale të Serbisë, në fakt, mbështesin status quo-në e destabilizimit dhe përçarjes. Ata qartë po e mbështesin Serbinë. Dhe përderisa disa “adhurues” të vuqiçëve e radojqiçëve përpiqen ta ruajnë këtë gjendje të paqëndrueshme, Kosova duhet të vazhdojë të ecë përpara, kryelartë, duke u bazuar në të drejtën e saj për të qeverisur territorin e saj pa ndërhyrje të jashtme. Historia nuk ka vend për ata që pengojnë progresin; ajo u përket atyre që, përballë pengesave, refuzojnë të ndalen. Në këtë kapitull të ri, Kosova po shkruan me guxim historinë e saj. Lavdi dëshmorëve të UÇK-së dhe lavdi një populli që refuzon të mposhtet, mashtrohet e nënshtrohet.
I dashur lexues, nëse vlerësoni përpjekjet e mia për të mbrojtur të drejtën tuaj për informim dhe të ardhmen e vendit tonë, ju ftoj të më mbështesni me aq sa mundeni.
Mund të bëni një donacion ose të abonoheni me pagesë €5 në muaj. Çdo kontribut juaj është një gur-themeli për të vazhduar të raportoj ndershmërisht dhe të hedh dritë mbi çështjet që kanë rëndësi për të gjithë ne.
Gazetaria e pavarur ka nevojë për mbështetjen tuaj për të mbrojtur sigurinë kombëtare, etikën e gazetarit dhe cilësinë e të raportuarit dhe integritetin tonë si komb.
Faleminderit që besoni dhe përkrahni këtë kauzë!
Autoritetet e Kosovës mbyllin institucione serbe, Prokuroria thotë se s'i autorizoi bastisjet — Radio Free Europe.
Fjala "kakofoni" nënkupton një përzierje të zhurmshme, të pakëndshme dhe të ç’rregullt zërash, shpesh e përdorur në kuptimin figurativ për të përshkruar një konfuzion mendimesh, deklaratash ose kritikash të paorganizuara dhe të paqarta.
Prokuroria thotë se s’ishte e përfshirë në bastisjen e sotme, ku u mbyllën disa struktura paralele serbe — ZERI.
“Kjo ka një faturë të madhe ndërkombëtare”, Agon Maliqi pret sanksione nga SHBA ndaj zyrtarëve të qeverisë — Gazeta Express.
Mbyllja e Zyrës Postare në Graçanicë — Kallxo.com.